Mes morisë së urimeve që vërshuan në Ditën e Pavarësisë së Kosovës, ishte dhe ai i të dërguarit të SHBA-së për operacione të posacme, Richard Grenell, i cili e shfrytëzoi megjithatë këtë moment për të kujtuan njeriun që bëri shpalljen zyrtare të mëvetësisë. “Ky moment historik është lënë në hije nga një padrejtësi e madhe. Ati themeltar i shtetësisë së Kosovës, Hashim Thaçi, do të duhej të festonte sot në Prishtinë – jo prapa hekurave në Hagë”, ka shkruar në plaftormën X ish i dërguari i Donald Trumpit gjatë mandatit të parë për dialogun Kosovë-Serbi. Grenell shton më tej se europianët kanë dështuar që të veprojnë kundër “kësaj padrejtësie në pesë vjetët e fundit”, e jo vetëm ata. “Edhe institucionet shtetërore të Kosovës, për shkak të politikës, kanë dështuar që të ndërmarrin veprime të domosdoshme ligjore për t’i dhënë fund kësaj padrejtësie”, vazhdon mesazhi i tij. Hashim Thaci e shpalli pavarësinë e Kosovës në 17 shkurt 2008. Ai po përballet me dy procese gjyqësore në Gjykatën Speciale në Hagë, dhe është në paraburgim që prej vitit 2020. Thaçi kishte nisur planifikuar një vizitë në Washington qershorin e atij viti, kur Zyra e Prokurorit i dërgoi Dhomave të Specializuara një aktakuzë me dhjetë pika për shqyrtim, në të cilën emri i Thaçit përmendej për një sërë krimesh. Në rastin e parë, ai akuzohet për krime lufte dhe krime kundër njerëzimit, bashkë me Kadri Veselin, Jakup Krasniqin dhe Rexhep Selimin, po ashtu ish-zyrtarë të lartë në Kosovë. Aktakuza qe ngritur nga prokurori Jack Smith, i cili paskësaj dha dorëheqjen për të hetuar presidentin Trump lidhur me përpjekjet për të përmbysur rezultatin e zgjedhjeve presidenciale të vitit 2020, e tani së fundi, dha dorëheqjen sërish nga Departamenti amerikan i Drejtësisë, pas fitores së Trumpit në zgjedhjet presidenciale të 5 nëntorit 2024.