Pasditen e sotme, një grabitje me armë zjarri është shënuar në Fushë-Krujë, në një pikë karburanti. Sipas burimeve, një person që lëvizte me një taksi ka kërcënuar me armë punonjësit e karburantit, duke marrë paratë e xhiros ditore. Pas grabitjes, autori ka braktisur mjetin dhe është larguar në drejtim të fshatrave të zonës së Fushë-Krujës. Burime policore bëjnë me dije se i riu dyshohet se ka kryer të paktën tre vjedhje brenda pak orësh. Ngjarja ka nisur në Tiranë, ku ai ka marrë një taksi në qendër të qytetit me pretendimin për të udhëtuar drejt Fushë-Krujës. Sapo mjeti është afruar në zonën e Tapizës, ai ka kërcënuar me armë zjarri taksistin, ka marrë drejtimin e automjetit dhe e ka lënë shoferin në një zonë të largët, duke i marrë gjithashtu paratë dhe telefonin celular. Më pas, autori është drejtuar drejt një pike karburanti në afërsi të Milotit, ku sërish nën kërcënimin e armës i ka marrë punonjësit shumën e parave të xhiros ditore. Automjeti është gjetur më vonë i braktisur pranë një xhamie në Fushë-Krujë, ndërsa autori është arratisur. Sipas policisë, i njëjti person dyshohet se ka përdorur të njëjtën skemë grabitjeje edhe në fund të muajit dhjetor, ku ka grabitur me forcë një taksist nga Tirana, duke i marrë para dhe telefon nën kërcënimin e armës.