Një nga këmbanat e Manastirit të Shën Gjergjit në Sarandë, objekt i shpallur monument kulture, është grabitur gjatë natës, duke u shkëputur me mjete prerëse dhe transportuar në rrethana ende të paqarta. Mungesa e këmbanës u konstatua nga kujdestari i manastirit, David Dulaj, i cili thekson se ajo ka një vlerë të jashtëzakonshme historike dhe shpirtërore për këtë objekt kulti rreth 250-vjeçar. Sipas tij, këmbana e grabitur ishte dhuruar ndër vite nga Mitropolia, si shenjë mbështetjeje dhe kujdesi për këtë monument të rëndësishëm të besimit ortodoks. Ai u bën apel personave që e kanë marrë këmbanën ta rikthejnë atë, duke e cilësuar aktin si një cenim të rëndë të trashëgimisë kulturore dhe një sulm ndaj besimit fetar. Rasti është denoncuar në Policinë e Sarandës, e cila ka nisur hetimet për zbardhjen e plotë të ngjarjes dhe identifikimin e autorëve. Ngjarja ka ngritur shqetësim në komunitetin lokal, ndërsa pritet reagimi i institucioneve përgjegjëse për mbrojtjen e monumenteve të kulturës. Manastiri i Shën Gjergjit është ndërtuar rreth shekullit XVIII dhe përbën një nga objektet më të rëndësishme të kultit ortodoks në zonën e Sarandës. Për më shumë se dy shekuj, ai ka shërbyer si qendër shpirtërore për komunitetin vendas, duke ruajtur vlera të veçanta historike, arkitekturore dhe fetare. Manastiri ndodhet në një kodër pranë aksit rrugor Sarandë–Ksamil, në afërsi të Plazhit të Manastirit.