Agjencia Amerikane për Mbrojtjen e Mjedisit (EPA) ka humbur një pjesë të fuqisë së saj për të reduktuar emetimet e gazeve serrë. Vendimi historik i Gjykatës së Lartë të SHBA-së përfaqëson një pengesë të madhe për planet e presidentit Joe Biden për klimën. Aktivistët mjedisorë kanë reaguar menjeherë duke e quajtur vendimin "tejkalim gjyqësor". Çështja kundër EPA u ngrit nga Virxhinia Perëndimore në emër të 18 shteteve të tjera kryesisht të udhëhequra nga republikanët dhe disa prej kompanive më të mëdha të qymyrit në vend. Ata ngritën diskutimin nëse agjencia ka fuqinë për të rregulluar emetimet për sektorët e energjisë në mbarë shtetin ose thjesht për termocentralet individuale. Këto 19 shtete ishin të shqetësuar se sektorët e tyre të energjisë do të detyroheshin të largoheshin nga përdorimi i qymyrit, me një kosto të rëndë ekonomike. Në një vendim 6-3, gjykata qëndroi në anën e shteteve konservatore dhe kompanive të karburanteve fosile. Megjithatë Gjykata nuk e ka penguar plotësisht EPA-n që të bëjë këto rregullore në të ardhmen - por thotë se Kongresi duhet të shprehet qartë se e autorizon këtë fuqi. Dhe Kongresi ka refuzuar më parë programet e propozuara të EPA për kufizimin e karbonit. Vendimi është një humbje e rëndësishme për presidentin Biden që hyri në detyrë me një zotim për të rritur përpjekjet e SHBA-së për mjedisin dhe klimën. Në ditën e tij të parë në detyrë, ai rifuti vendin në Marrëveshjen e Parisit, marrëveshjen e parë universale ligjërisht të detyrueshme për objektivat e ndryshimeve klimatike. PAmjet: AFP