Një avion i madh transporti i ushtrisë amerikane u ul këtë të martë në Moskë, duke nxitur pikëpyetje rreth misionit të tij. Kremlini deklaroi se nuk ka informacion për avionin, ndërsa nuk dihet nëse ai transportonte pasagjerë apo ngarkesa. Avioni ushtarak amerikan Boeing C-17 Globemaster u ul në aeroportin Vnukovo të Moskës rreth orës 09:00, me orën lokale. Sipas të dhënave të shërbimit Flightradar24, avioni me numër regjistrimi amerikan 07-7181 kishte fluturuar drejtpërdrejt nga Riga e Letonisë. Reuters nuk mundi të verifikonte nëse në bord kishte pasagjerë apo ngarkesa, ndërsa Kremlini deklaroi se nuk dispononte informacion mbi këtë fluturim. Avioni kishte mbërritur në Riga më 23 gusht, pasi ishte nisur nga baza amerikane Camp Springs, pranë Uashingtonit. Fluturimi i fundit i drejtpërdrejtë drejt Rusisë i një avioni të regjistruar në Shtetet e Bashkuara ishte zhvilluar në janar. Në bord ndodheshin të dërguarit e posaçëm Steve Witkoff dhe Jared Kushner, të cilët zhvilluan bisedime me presidentin Vladimir Putin për luftën në Ukrainë. Kremlini njoftoi javën e kaluar se ende nuk kishte informacion për një vizitë tjetër të tyre në Moskë, ndërsa bisedimet amerikano-ruse për Ukrainën kanë ngecur në një masë të madhe.