Gjykata e Durrësit ka lënë të lirë gjyshen e 3-vjeçarit Amar Gjuni, duke caktuar masën e sigurisë "Detyrim paraqitjeje". Akuza që rëndon ndaj gjyshes, që është dhe invalide, është ajo e rrëmbimit ose mbajtjes peng të personit në bashkëpunim. Me të njëjtën akuzë ndodhen nën masën shtrënguese "arrest në burg" edhe bashkëshorti dhe vëllai i saj, masë e caktuar nga e njëjta gjyqtare, Besjana Garxenaj, një ditë para se gjyshja të vetëdorëzohej. Gjykata e vlerësoi të paligjshëm ndalimin e Bahrie Gjunit nga policia, pasi nuk kishte një urdhër paraprak nga prokuroria për ndalimin e saj. Gjatë seancës që u zhvillua me dyer të mbyllura Bahrie Gjuni nuk është shfaqur e penduar. Në gjendje të rënduar psikologjike që pas vdekjes së të birit në një aksident automobilistik, ajo ka deklaruar se gjithçka e bëri nga dashuria dhe nevoja për t'u kujdesur vetë për nipin i cili kohët e fundit ka qenë i sëmurë dhe trajtohej me medikamente. "Doja të kujdesesha për të që të shërohej sa më shpejt." Më tej, ka pranuar se ajo dhe bashkëshorti kanë pasur konflikte me nusen e djalit kur ajo vendosi të kthehej tek prindërit e saj së bashku me nipin e tyre, ndonëse ata i kanë kërkuar ta rrisnin vetë atë.