Gjykata Kushtetuese e Kosovës ka reaguar pasi presidentja e vendit, Vjosa Osmani ka tërhequr kërkesën e saj në këtë gjykatë, siç tha ajo, pasi gjyqtar raportues është caktuar Radomir Llaban. Sipas Kushtetueses, ndarja e lëndëve bëhet në bazë të rregullave procedurale dhe se vendimet merren në përbërje të plotë të kolegjit. Gjykata shton se është e drejtë e palëve të kërkojnë tërheqjen e kërkesave të parashtruara. Sa i përket gjyqtarit Llaban, për të cilin Osmani tha se ka tre raporte të institucioneve të sigurisë që tregojnë se i njëjti cënon rendin kushtetues dhe sigurinë nacionale të Kosovës, Gjykata Kushtetuese sqaron se ai iu është nënshtruar të gjitha procedurave kushtetuese e ligjore. "Sa u përket çështjeve të ngritura përkitazi me Gjyqtarin e Gjykatës Kushtetuese Radomir Laban, siç jeni të informuar, i njëjti ka qenë i punësuar në Gjykatën Kushtetuese që nga viti 2011, në pozitën e Këshilltarit juridik, dhe që nga data 9 gusht 2018 ushtron funksionin e Gjyqtarit të Gjykatës Kushtetuese, pasi i është nënshtruar të gjitha procedurave kushtetuese e ligjore, për propozimin e tij nga Kuvendi i Republikës së Kosovës dhe dekretimit nga Presidenti i Republikës së Kosovës", sqarohet nga Kushtetuesja. Po ashtu, potencohet se në përputhje me përgjegjësitë dhe mandatin e saj, kjo gjykatë "i trajton të gjitha kërkesat e dorëzuara nga palët e autorizuara me paanshmëri, përkushtim dhe profesionalizëm, ashtu siç përcaktohet në Kushtetutën e Republikës së Kosovës". Në anën tjetër, edhe kryeministri në detyrë, Albin Kurti i ka vlerësuar se caktimi i Radomir Llabanit si gjyqtar raportues paraqet rrezik për rendin kushtetues. DEK Albin Kurti - Kryeministër në detyrë "As presidenti i atëhershëm në vitin 2018 e as kryetarja e atëhershme e Gjykatës Kushtetuese në vitin 2018 nuk e kanë parë të arsyeshme që të ndalin një proces të tillë, sepse është absurde është që dikush që është i papërshtatshëm, me rrezik për rendin tonë kushtetues, që të gjykojë mbi një çështje kushtetuese" Të martën, Presidentja e Kosovës, Vjosa Osmani njoftoi për tërheqjen e lëndës në Gjykatën Kushtetuese, përmes së cilës kërkohej të sqaroheshin pasojat juridike të moskonstituimit të Kuvendit. Pavarësisht kësaj, Gjykata Kushtetuese bazuar në ligj dhe rregulloren e punës mund të shqyrtojë e të nxjerrë vendim për kërkesën edhe pas tërheqjes së saj, por vetëm nëse e vlerëson se ka rëndësi të lartë.