Një gjyqtar federal ka bllokuar përkohësisht vendimin e Donald Trump për ndalimin e granteve dhe huave federale, një vendim që ka tronditur programet që mbështeten nga miliona amerikanë. Gjyqtari Loren AliKhan ka urdhëruar një pezullim administrativ të ndalimit të fondeve, pak para se ai të hyjë në fuqi, duke i dhënë kështu mundësinë një grupi organizatash jofitimprurëse dhe bizneseve të vogla të padisin për këtë vendim. Në një memorandum të hënën, Matthew Vaeth, kreu i përkohshëm i Zyrës së Menaxhimit dhe Buxhetit nën administratën e Trump, u kërkoi të gjitha agjencive federale të “pezullojnë përkohësisht të gjitha aktivitetet që lidhen me shpërndarjen e ndihmës financiare federale”. Ndalimi nuk përfshin sigurimin shoqëror dhe shëndetësore, dhe nuk preken ndihmat që u jepen drejtpërdrejt individëve.