Ervin Salianji ka publikuar përgjimet telefonike mes ish-drejtorëve të policisë Fier dhe shtetasin Alfred Alizoti, i cili sipas deputetit të partisë demokratike ka marrë një shumë parash për të kryer burg. Nëpërmjet një konference për mediat Salianji e cilësoi gjyqin e tij sulm politik me qëllim për ta dënuar. Pas publikimit të përgjimeve telefonike, Salianji shtoi se ka dhe qindra komunikime të tjera që ndodhen në dosjen zyrtare të SPAK. “Ka dhjetëra komunikime të tjera mes drejtorit të përgjithshëm, ish-drejtorit të përgjithshëm, ish-drejtuesve të policisë së shtetit, dhe ish prokurorit të çështjes, Gentian Osmanit, kur në të gjitha raste vendosen për të marrë para, kohën kur do të bëhej arrestimi fals, ku Alfred Alizoti të bënte burg në këmbim të parave. Datën në të cilën drejtuesi i policisë së Fierit, i thotë që shefi i madh është jashtë shtetit, përkon me datën kur Fatmir Xhafaj ishte në Kroaci. Pra gjithçka është vendosur, e gjithë sajesa në lidhje me gjyqin për kallëzimin e pabërë, është paraqitur në gjykatë vetëm që të shmanget nga dënimi i ri, vëllai i ministrit të brendshëm të kohës, përveç kësaj, gjyqtari që është i përfshirë në çështje ka marrë përsipër të bërë diçka të pamendueshme që nuk është në funksion të ligjit”. Vendimi për deputetin e PD që akuzohet për kallëzim të rremë në lidhje me denoncimin që Albert Veliu bëri për Agron Xhafajn, vëllain e ish-ministrit të brendshëm, Fatmir Xhafajn do të jepet nesër.