Dy aktivistë, pjesë e një flotiljeje që synonte të arrinte në Gaza, janë paraqitur këtë të diel para një gjykate izraelite, pasi u dërguan në Izrael për t’u marrë në pyetje, bëri të ditur një organizatë për të drejtat e njeriut. Flotilja, e përbërë nga mbi 50 anije, ishte nisur nga Franca, Spanja dhe Italia me synimin për të thyer bllokadën izraelite ndaj Gazës dhe për të dërguar ndihma në territorin palestinez të shkatërruar nga lufta. Ajo u ndalua nga forcat izraelite në ujëra ndërkombëtare pranë Greqisë në orët e para të së enjtes, ndërsa sipas Izraelit, rreth 175 aktivistë u ndaluan, dy prej të cilëve u dërguan në Izrael për hetim. Bëhet fjalë për shtetasin spanjoll Saif Abu Keshek dhe brazilianin Thiago Avila, të cilët dolën para gjykatës në Ashkelon. Sipas Miriam Azem nga organizata Adalah, autoritetet izraelite kanë kërkuar zgjatjen e ndalimit të tyre edhe për katër ditë të tjera.