Gjykata Speciale do të shpallë aktgjykimin për ish-krerët e Ushtrisë Çlirimtare të Kosovës më 16 shtator të këtij viti. Kjo është edhe një shtyrje tjetër pasi vendimi përfundimtar pritej të bëhej më 20 korrik. "Trupi Gjykues ka caktuar datën për shqiptimin e Aktgjykimit në çështjen gjyqësore Prokurori i Specializuar k. Hashim Thaçit, Kadri Veselit, Rexhep Selimit dhe Jakup Krasniqit, për më 16 shtator, në orën 10:00", njoftoi specialja. Sipas po të njëjtit njoftim, trupit gjykues i duhet kohë për shqyrtimin e të gjitha provave të paraqitura. "Në urdhrin për caktimin e datës, Trupi Gjykues shpjegoi se koha e nevojshme për kuvendimet ishte zgjatur në përputhje me Rregulloren, për shkak të vëllimit të madh të provave të marra dhe kompleksitetit të procesit gjyqësor, dhe se kjo zgjatje përligjej nga nevoja për të bërë një vlerësim të arsyetuar, tërësor dhe të drejtë të dokumentacionit të çështjes", thuhet në njoftim. Procesi gjyqësor ndaj Hashim Thaçit, Kadri Veselit, Rexhep Selimit e Jakup Krasniqit u përmbyll me fjalën përfundimtare në shkurt të vitit 2026. Zyra e Prokurorit të Specializuar në fjalën përfundimtare të paraqitur para trupit gjykues kishte kërkuar 45 vjet burgim për secilin prej tyre, ndërkohë që mbrojtja e Thaçit, Veselit, Selimit e Krasniqit kishte kërkuar shpalljen e tyre të pafajshëm. Ish-krerët e UÇK-së akuzohen për krime lufte dhe krime kundër njerëzimit. Të njëjtët ndodhen në paraburgim nga nëntori i vitit 2020.