Gjykata Supreme e Shteteve të Bashkuara rrëzoi të martën kërkesën e presidentit Donald Trump për kufizim të shtetësisë nga lindja, duke e hedhur poshtë kështu një prej prioriteteve të administratës së tij për luftën kundër emigracionit të paligjshëm. Gjykata e shpalli të pavlefshëm një urdhër ekzekutiv të nënshkruar nga Trumpi përmes së cilit urdhëroheshin agjencitë amerikane që të mos njihnin shtetësinë e fëmijëve të lindur në SHBA nëse asnjëri prej prindërve nuk ishte shtetas amerikan ose nuk kishte banim të përhershëm apo siç njihet ndryshe “green card”. Vendimi përbën një humbje për Trumpin, pasi kjo ishte një nga premtimet e fushatës së tij. Mandati i tij i dytë është karakterizuar kryesisht nga përpjekjet për të ashpërsuar masat kundër imigracionit, raportoi Associated Press. Vendimi i Gjykatës Supreme lë në fuqi interpretimin e deritanishëm se çdo person i lindur në territorin e Shteteve të Bashkuara fiton automatikisht shtetësinë amerikane, edhe nëse prindërit e tij nuk janë shtetas amerikanë. “Ky është një dëm i madh që po i bëhet Amerikës dhe shpresoj që Kongresi ta korrigjojë këtë gabim”, ishte reagimi i presidentit amerikan pas vendimit të Gjykatës. Gjykata Supreme e Shteteve të Bashkuara vendosi të martën gjithashtu se shtetet mund t’i ndalojnë studentët transgjinorë të garojnë në ekipet sportive të vajzave në shkolla. Ky është vendimi më i fundit në një seri humbjesh ligjore për personat transgjinorë në SHBA.