Një gjykatë federale në Uashington urdhëroi administratën e Donald Trump që të ndalë përpjekjet që synojnë shuarjen e Zërit të Amerikës (VOA), që u mbyll muajin e kaluar nga vetë Presidenti amerikan. Gjykatësi Royce Lamberth lëshoi këtë të mërkurë një urdhër paraprak që thotë se zyrtarët duhet “të marrin të gjithë hapat e nevojshme” për të rikthyer punonjësit dhe bashkëpunëtorët në pozitat e tyre në VOA dhe që të rikthehen fondet, e miratuara nga Kongresi, për dy transmetuesit e tjerë të financuar nga Qeveria amerikane – Radio Azia e Lirë dhe Rrjeti i Transmetuesit të Lindjes së Mesme – dhe të rifillojnë transmetimet në radio, televizion dhe internet. Lamberth, i cili po trajton gjashtë padi nga punonjësit dhe bashkëpunëtorët e prekur nga mbyllja e urdhëruar nga Agjencia e SHBA-së për Media Globale (USAGM), që mbikëqyr transmetuesit federalë, urdhëroi po ashtu mediat që të paraqesin raporte mujore mbi ecurinë, për të treguar nëse kjo agjenci po zbaton urdhrin për të lejuar ata të “ofrojnë lajme që vazhdimisht janë të besueshme, të sakta, objektive dhe gjithëpërfshirëse”. Muajin e kaluar, VOA ngriti padi ndaj administratës Trump, e cila pushoi nga puna më shumë se 1000 punonjës dhe ndërpreu kontratat me rreth 600 bashkëpunëtorë, duke e detyruar Zërin e Amerikës, që për herë të parë që nga themelimi më 1942, të ndalë transmetimin.