Një gjykatë federale në Manhatan ka rrëzuar vendimin e administratës Trump për vizat e emigrantëve nga 75 vende të botës, përfshirë edhe Shqipërinë. CNN, thotë se vendimin e mori gjykatësja Jeannette Vargas, e cila shpalli të paligjshëm vendimin e Departamentit të Shtetit të marrë në janar të këtij viti, i cili pezullonte lëshimin e vizave të emigracionit (për qëndrim të përhershëm) për pothuajse 40% të shteteve të botës. Administrata Trump e pati arsyetuar këtë vendim me pretendimin se do të parandalonte hyrjen e personave që do të ktheheshin në "ngarkesë publike". Lista përfshinte 75 shtete, kryesisht jo-europiane. Në listë përfshihej edhe Shqipëria, së bashku me vende të tjera të Ballkanit, Evropës Lindore, Afrikës, Azisë, Lindjes së Mesme, Karaibeve dhe Amerikës Latine. Pezullimi prekte personat që kërkonin të emigronin dhe të vendoseshin përfundimisht në Shtetet e Bashkuara, ndërsa vizat turistike nuk ishin pjesë e kësaj mase. Administrata Trump e kishte justifikuar politikën me shqetësimin se emigrantët nga këto vende mund të bëheshin barrë për sistemin amerikan të ndihmës publike. Por gjykata arsyetoi se ligji kërkon që çdo aplikant të vlerësohet individualisht, duke marrë parasysh gjendjen financiare, moshën, shëndetin, aftësitë dhe rrethanat familjare. Sipas gjykatës, politika i detyronte në praktikë zyrtarët konsullorë të refuzonin aplikime vetëm mbi bazën e shtetësisë, edhe kur aplikanti paraqiste prova se mund të përballonte financiarisht jetesën në SHBA. Megjithatë, vendimi i gjykatës nuk do të thotë automatikisht se çdo rast i refuzuar për arsye të tjera ligjore do të miratohet. Gjykata ka rrëzuar bazën e këtij pezullimi, ndërsa çështjet e refuzuara për arsye të tjera mund të mbeten në fuqi. Administrata Trump gjithashtu mund ta apelojë vendimin, ndërsa Departamenti i Drejtësisë dhe Shtëpia e Bardhë ende nuk kanë dhënë një koment zyrtar. Vendimi përbën një tjetër përplasje mes administratës Trump dhe gjykatave amerikane mbi politikat e emigracionit, ndërsa për shqiptarët e prekur nga pezullimi pritet të jetë me rëndësi mënyra se si autoritetet amerikane do të zbatojnë vendimin dhe do të trajtojnë aplikimet e prekura.