Gjykata e Lartë rrëzoi rekursin e Laert Haxhiut, duke lënë në fuqi vendimin e Apelit të Posaçëm, që e ka dënuar me burgim të përjetshëm për “Masakrën e Lushnjës”. Gjykata nuk pranoi kërkesën e Haxhiut për zbutjen e dënimit të përjetshëm, të dhënë nga trupa gjykuese e përbërë nga Ilir Panda, Sokol Binaj dhe Sandër Simoni. Laert Haxhiu është shpallur fajtor për ngjarjen e rëndë të ndodhur në vitin 2017 në Lushnjë, ku mbetën të vrarë Zamir Latifi dhe Jurgen Hoxha, ndërsa u plagosën Bujar Turku dhe Marius Xhepexhiu. Për të njëjtën çështje janë dënuar me burgim të përjetshëm edhe Orgest Bilbili dhe Anterio Kaloshi. Të dënuarit akuzohen për veprat penale “Vrasje në rrethana cilësuese të një ose më shumë personave”, “Kryerja e veprave penale në kuadër të grupit kriminal”, “Mbajtja pa leje dhe prodhimi i armëve, armëve shpërthyese dhe i municionit”, si dhe “Prishja e qetësisë publike”. Laert Haxhiu u arrestua në Greqi, në vitin 2023, dhe më pas u ekstradua drejt vendit tonë për t’u përballuar me drejtësinë për krimet e kryera.