Kërkesat e ish-kryebashkiakut Erion Veliaj për transmetim të seancave gjyqësore dhe heqjen e kafazit të qelqtë duke qëndruar pranë avokatit të tij, u rrëzuan nga Gjykata e Posacme në seancën e kësaj të hëne. Avokati i Veliajt, Plarent Ndreca deklaroi për mediat se kryebashkiaku nuk do të marrë pjesë nëpër seancat gjyqësore për sa kohë nuk mundësohen kushtet e barabarta. “Transmetimi live është pjesëmarrja e publikut në mënyrë më të gjerë, përtej gaztearëve dhe transmetimi i çdo debati apo kontradite në procesin penal. Vendimi i Gjykatës nuk e respekton këtë parim kushtetues. Për kërkesën time për njohjen me aktet dhe kundër argumentet që janë kthyer në klishe nga prokuroria, e konsideron si zvarritje, në fakt ekspozon qëllimin e prokurorisë që nuk ka për qëllim të realizojë një proces të rregullt ligjor. Është kafazi i qelqtë që ishte një ndër kërkesat tona për të krijuar mundësinë që zoti Veliaj të jetë përkrah avokati si palë në proces dhe i pafajshëm. Është kriter kushtetues që palët duhet të jenë të barabarta dhe të komunikojnë me avokatin e tij në mënyrë dinamike në proces. Avokati Ndreca deklaroi gjithashtu se në të paktën 35 fashikuj ndodhen prova digjitale të cilat rezultojnë të pahapura dhe për rrjedhojë të paanalizuara dhe të pavlerësuara nga gjykata e seancës paraprake.