Gjykata e Posacme dënon me burgim të përjetshëm, Laert Haxhiun, kundërshtarin e bandës së Aldo Bares, shtatë vite pas maskarës së Lushnjes me 2 të vrarë, Zamir Latifit, mik të nipit të Aldo Bares, dhe Jurgen Hoxhës, ndonëse objektivi i vrasjes ishte djali i vëllait të Aldo Bares, Xhulio Shkurti. Nipi i të fortit të Lushnjës ishte larguar nga vendi i ngjarjes vetëm pak minuta para atentatit. Gjykata e Posacme në vendimin e dhënë për Haxhiun e dënon atë për Vrasje me paramendim” për hakmarrje, mbetur në tentativë, “Vrasje në rrethana të tjera cilësuese”, “grup të strukturuar kriminal”, “Mbajtje pa leje të armëve dhe municioneve”. Me këtë vendim, Haxhiu rrezikon të kyçet përjetë në qelitë e burgut shqiptar, nëse drejtësia greke, aty ku edhe u arrestua në maj të një viti më parë, vendos për ekstradimin e tij në Shqipëri. Ndonëse gjykata e Apelit të Janinës i hapi rrugë ekstradimit të Laert Haxhiut në Shqipëri, 31-vjeçari lushnjar do luajë mundësinë e fundit, atë të kundërshtimit të vendimit të ekstradimit në Gjykatën e Lartë. Ajo që e fundosi përfundimisht Laert Haxhiun ishte dëshmia e të penduarit të drejtësisë Artan Tafani, i cili rrëfeu përfshirjen e Haxhiut në 16 ngjarje kriminale, mes të cilave 4 vrasje në Shqipëri dhe 2 të tjera në Greqi. Mes rrëfimit ishte dhe plani i Haxhiut për të vrarë persona të drejtësisë, përfshirë prokuroren e SPAK, Doloreza Musabelliu, dhe atë të Lushnjës, Merita Selimi, për të cilat u sigurua mbrojtje e posaçme.