Dëgjesa e Komisionit të Posaçëm Parlamentar për Reformën Administrativo-Territoriale u zhvendos sot në Gjirokastër. I pranishëm në këtë takim ishte edhe kreu i Partisë Bashkimi për të Drejtat e Njeriut, Vangjel Dule, i cili iu drejtuar bashkëkryetarit të kësaj reforme, Arbjan Mazniku, duke i thënë se nuk është dakord me dy teza të ngritura prej tij. Sipas Dules, Mazniku pretendon të shkëpusë nocionin bazë të hapësirës, dhe se sipas tij reforma territoriale nuk duhet nisur nga kufijtë. Shqetësim tjetër për Dulen ishte edhe mungesa e përfaqësimit në këshillat bashkiak të Gjirokastrës të disa ish-komunave në jug të vendit. Mazniku në përgjigje ndaj tij, tha se kur flasim vetëm për territorin, nuk shkohet gjëkundi pasi sipas tij problemi që duhet zgjidhur është mundësia për të ofruar shërbime për qytetarët. Në këtë debat ka ndërhyrë edhe bashkëkryetari i Reformës Luçiano Boçi, i cili tha se pushteti lokal është përfaqësim, shërbim, autonomi financiare, demokraci dhe decentralizim, dhe sipas tij pjesa e opinioneve futet në subjektivizëm.