Kandidati i opozitës për Himarën, Petro Gjikuria, ka reaguar, pas humbjes së thellë ndaj Vangjel Tavos nga Partia Socialiste. Ai ka akuzuar se u përdorën metoda antidemokratike dhe se sipas tij u transformuan listat e zgjedhësve. “Kjo betejë ishte pararojë e betejave të ardhshme që do të thirremi për vendin tonë. Listat e zgjedhësve u përshtatën me interesat e kundërshtarëve tanë, duke i dhënë mundësinë një ushtrie partiake të merrte pjesë në zgjedhje dhe njëkohësisht, duke u mohuar këtë të drejtë mijëra qytetarëve të Himarës”, shkruan në statusin e tij Gjikuria. Pas numërimit të votave në Himarë, reagoi edhe kryetari i Partisë Demokratike, Sali Berisha, që nuk e ka pranuar humbjen, duke e cilësuar procesin zgjedhor si grabitjen e radhës. Në një reagim në rrjetet sociale, Berisha akuzon kryeministrin Rama për krim elektoral në Himarë. Sipas tij, ndërhyrjet në procesin zgjedhor, manipulimet me listat e zgjedhësve dhe përjashtimi i 6153 qytetarëve nga votimi dëshmojnë se mandati i Tavos qendron mbi krimin elektoral.