Në takimin përmbyllës të fushatës elektorale të Partisë Socialiste përpara banorëve të Rajonit 5, drejtuesi politik i Partisë Socialiste për Qarkun e Vlorës, Gjiknuri shtoi se rruga e nisur nuk ka kthim pas e se mandati i tretë do të jetë mandati i investimeve në zonat periferike. “Fushata elektorale është drejt fundit, natyrshëm mbështetja për PS është e dukshme. Fitorja ndjehet kudo dhe jam i sigurtë se PS do ta marrë këtë mazhorancë. Kjo i ka tërbuar kundërshtarët, sidomos atë Presidentin e Republikës, që ka dalë tani të gjejë kudo fajtorë për humbjen e të shpallë atë revolucionin që ka në kokë që vlonjatët e shqiptarët në tërësi do marrin armët, sfurqet e shpatat se ky zotëria po na humbka zgjedhjet. Kjo është shenja e parë e humbjes së tyre. Po të ishin të sigurt për fitoren ata pse do bënin zhurmë? Siç kemi bërë ne në 2013 kur ishim krejt të qetë se fitorja dukej. Kanë filluar të thonë po blihen vota, ndërkohë që të vetmit njerëz që kapen janë anëtarët e LSI dhe simpatizantët e tyre që blejnë vota. Pra, kanë filluar të përgatisin justifikimin për humbjen”, tha Gjiknuri.