Ndërsa koalicioni qeverisës në Gjermani ra, pyetja që po i shqetëson të gjithë atje është se kur do të zhvillohen zgjedhejt e parakohshme? Kancelari Olaf Scholz fillimisht caktoi datën 15 janar si datë për votëbesimin, por pas presionit nga Unioni, FDP dhe Të Gjelbërit, ende partnerë të koalicionit, Scholz u shpreh i gatshëm për një datë më të hershme. Por, Drejtuesja Federale e Zgjedhjeve, i bën thirrje kancelarit Olaf Scholz që të mos nxitojë me datën për zgjedhje të reja. Për arsye organizative, kjo është e rrezikshme, thotë ajo në një letër drejtuar Scholz, sipas mediave gjermane. Për zgjedhje të mirëorganizuara, thotë Ruth Brand në letrën e saj duhet të shfrytëzohet plotësisht periudha prej 60 ditësh nga shpërbërja e Bundestagut. "Nëse datat dhe afatet do të binin gjatë sezonit të Krishtlindjeve ose në periudhën midis viteve, periudha shumë e shkurtër prej 60 ditësh do të shkurtohej ndjeshëm”.