Nuk ka kaluar as një javë nga masakra në Solingen të Gjermanisë dhe qeveria e Olaf Scholz shpalli masa ta forta ndaj armëve dhe emigrantëve. Mbajtja e thikave është ashpërsuar dhe do të ndalohet në festivalet popullore, në trena dhe në transportin në distanca të gjata. Mjetet me teh prerës do të lejohen vetëm për kategori të caktuara, si gjuetarët. Ndërkaq, është bërë më e vështirë marrja e autorizimit për të mbajtur armë. Qeveria gjermane po rishikon gjithashtu trajtimin e refugjatëve: ndihma për azilkërkuesit, të cilët, pavarësisht se janë në Gjermani, por kanë kaluar nëpër disa vende dhe më pas kanë vendosur të qëndrojnë aty, do të ndërpritet. Bëhet akoma më e vështirë për të përfituar azil edhe për ata që kanë kryer krime ose gjatë arrestimit rezultojnë se posedojnë armë apo sende të rrezikshme. Dëbimi për ta do të jetë i menjëhershëm. Paketa e masave u prezantua nga Ministrja e Brendshme Nancy Faser. Kancelari Scholz i mirëpriti këto nisma, të cilat konsiderohen nga mediat si pasojë e sulmit të kryer nga një 26-vjeçar sirian, i cili vrau me thikë javën e shkuar tre persona dhe plagosi tetë të tjerë gjatë jubileut të qytetit Solingen.