Që nga sulmi terrorist i Hamasit mbi Izraelin hebrenjtë në Gjermani nuk kanë qenë në rrezik kaq të madh sa janë sot. Krahasuar me tremujorët e mëparshëm nga tetori ka pasur rreth dy herë më shumë krime anti-Semite, thote DW. Enti Federal për Kriminalitetin (BKA) ka regjistruar më shumë se 1.100 krime antisemite që lidhen me përshkallëzimin e konfliktit në Lindjen e Mesme. Një zëdhënës i BKA-së tha për Agjencinë Gjermane të Shtypit, dpa, se fjala është për krime të motivuara politikisht. Veprat penale lidhen kryesisht me dëmtime materiale dhe nxitjen e urrejtjes. Shifra e regjistruar në tremujorin e fundit të vitit 2023 është rreth dy herë më e lartë se në tre tremujorët e parë të këtij viti, ndërsa numri i përgjithshëm i krimeve antisemite ka të ngjarë të jetë dukshëm më i lartë. Që nga nëntori i vitit të kaluar deri në nëntor 2023 janë regjistruar gjithsej 2,874 krime antisemite, ndër to 88 krime të dhunshme. I ngarkuari i qeverisë gjermane përantisemitizmin, Felix Klein, tha për mediat se sulmi terrorist i Hamasit shënon një "pikë kthese për sigurinë e hebrenjve në Gjermani". Sipas tij këtë vit numri i krimeve antisemite në Gjermani ishte më i lartë se kurrë. Klein tha se "që nga Holokausti hebrenjtë në vend nuk kanë qenë në rrezik kaq të madh sa janë sot”. Ambasadori i Izraelit në Gjermani, Ron Prosor, bëri thirrje për një përgjigje vendimtare ndaj këtij zhvillimi. "Fakti që hebrenjtë kanë frikë të dalin në rrugë me kësulat e tyre tradicionale ose të flasin me dikë në celular në hebraisht, thjesht nuk mund të pranohet. "Ne duhet të zgjohemi," tha ai për Agjencinë Gjermane të Shtypit - dpa.