Kancelari i Gjermanisë, Olaf Scholz, deklaroi të mërkurën se komentet e presidentit amerikan, Donald Trump, i cili e quajti diktator presidentin ukrainas, Volodymyr Zelensky, janë të rrezikshme. “Është thjesht e gabuar dhe e rrezikshme që të mohohet legjitimiteti demokratik i presidentit Zelensky. E vërteta është se Zelensky është kreu i shtetit të Ukrainës. Fakti që zgjedhjet nuk mund të mbahen në kohë lufte është e reflektuar në kushtetutën e Ukrainës dhe në ligjin e saj zgjedhor”, ka thënë Scholz. Reagimit të Scholzit i është bashkëngjitur edhe ministrja e Punëve të Jashtme të Gjermanisë, Annalena Baerbock, e cila i portretizoi komentet e Trumpit si absurde. “Askush përpos Putinit nuk e ka filluar apo dëshiruar këtë luftë në zemër të Evropës. Duhet që të shikojmë botën reale në vend që të shkruajmë ndonjë postim në rrjetet sociale. Ata që jetojnë në Evropë e dinë se kush po jeton sot në kushtet e një diktature. Po, e dinë të gjithë se në diktaturë po jetojnë njerëzit në Rusi dhe në Bjellorusi”, tha Baerbock. Qëndrim kritik ka mbajtur edhe lideri i CDU, Fridrih Merc, që ka thënë se “është i shokuar kur ka dëgjuar se Trump e ka cilësuar Zelenskyn diktator dhe fajtor për luftën në Ukrainë”. Edhe Norvegjia kritikoi qëndrimet e Donald Trump. "Unë mendoj se kjo deklaratë është thellësisht e pajustifikuar. Zelensky është një president i zgjedhur nga populli me një shumicë dërrmuese votash, i cili u kap në mes të mandatit të tij nga një luftë në shkallë të gjerë" tha kryeministri norvegjez Jonas Gahr Store (Junas gar tërë) lidhur me deklaratat e presidentit amerikan.