Ministri gjerman i Ekonomisë, Robert Habeck, tha se Gjermania do të mbajë dy termocentrale bërthamore të funksionojnë përtej vitit 2022 nëse problemet që kanë nxjerrë jashtë funksionit reaktorët francezë mbeten të pazgjidhura. Ai e ka quajtur një vendim të tillë si të “nevojshëm”, duke thënë se bisedimet me operatorëve e dy centraleve -Isar 2 dhe Neckarëestheim - kanë përfunduar, dhe çështjet kyçe janë adresuar. Gjermania pati planifikuar që të ndalë të gjitha centralet bërthamore në fund të këtij viti, por lufta në Ukrainë ka rritur shqetësimet se shtetit do t’i duhet të shfrytëzojë të gjitha burimet e energjisë për të kaluar dimrin. Më shumë se gjysma e centraleve bërthamore në Francë aktualisht nuk janë të aktivizuara në rrjet. Kjo situatë ka çuar në mungesa të energjisë, por Gjermania ka ofruar ndihmë përmes kompensimit të energjisë së prodhuar nga centralet me gaz, ka thënë Habeck. Perëndimi e ka ndëshkuar Rusinë me sanksione të ashpra për shkak të luftës së nisur në Ukrainë.Për pasojë, Rusia e ka zvogëluar sasinë e gazit që çon në Evropë, duke rritur shqetësimet për dimër të vështirë. Para shpërthimit të luftës, Bashkimi Evropian ka siguruar nga Rusia 40 për qind të gazit që përdor brenda një viti.