Në kuadër të 35-vjetorit të Traktatit të Fqinjësisë Gjermani-Poloni, dy vendet anëtare të Bashkimit Evropian dhe NATO-s kanë ndërmarrë një hap të rëndësishëm drejt forcimit të bashkëpunimit në fushën e mbrojtjes. Ministri gjerman i Mbrojtjes, Boris Pistorius, zhvilloi një vizitë zyrtare në Varshavë, ku së bashku me homologun e tij polak, Władysław Kosiniak-Kamysz (Vlladisllav Koshinjak-Kamish), nënshkroi një marrëveshje të re bashkëpunimi ushtarak. Takimi u zhvillua në një atmosferë miqësore, duke reflektuar vullnetin e të dy vendeve për të thelluar marrëdhëniet strategjike. Marrëveshja riafirmon angazhimin e përbashkët të Gjermanisë dhe Polonisë ndaj NATO-s dhe Bashkimit Evropian, si dhe detyrimin për ndihmë të ndërsjellë në rast nevoje. Ajo synon gjithashtu zgjerimin e bashkëpunimit në zhvillimin e kapaciteteve ushtarake, industrinë e mbrojtjes dhe organizimin e stërvitjeve të përbashkëta ushtarake. Dokumenti përfshin edhe fusha të tjera të rëndësishme si siguria kibernetike, mbrojtja e infrastrukturës kritike, siguria në Detin Baltik, aktivitetet në hapësirë, kërkimi shkencor dhe mbrojtja e rrugëve detare. Sipas ministrit gjerman Pistorius, marrëveshja jo vetëm që i përgjigjet realiteteve të reja të sigurisë në Evropë, por hap edhe një kapitull të ri në marrëdhëniet mes dy vendeve. Polonia konsiderohet një nga vendet më të ekspozuara ndaj kërcënimeve të sigurisë në Evropë për shkak të kufirit të saj me Rusinë dhe Bjellorusinë. Për këtë arsye, Varshava investon rreth pesë për qind të Prodhimit të Brendshëm Bruto në mbrojtje, duke qenë ndër vendet me shpenzimet më të larta ushtarake në NATO. Ministri polak i Mbrojtjes, Władysław Kosiniak-Kamysz, theksoi se kërcënimi kryesor për Poloninë vjen nga lindja dhe jo nga perëndimi. Ai kujtoi se për dekada me radhë breza të tërë kanë punuar për të siguruar që tragjeditë historike të vitit 1939 të mos përsëriten më. Sipas tij, pavarësisht se e kaluara nuk është harruar, Gjermania dhe Polonia sot janë partnere dhe aleate që po ndërtojnë së bashku një të ardhme më të sigurt. Një pjesë e rëndësishme e bashkëpunimit lidhet me forcimin e krahut lindor të NATO-s. Gjermania dhe Polonia planifikojnë të zgjerojnë sistemin e tubacioneve të gazit të NATO-s drejt shteteve baltike për të garantuar furnizime të qëndrueshme me karburant në rast krizash apo konfliktesh. Gjithashtu, synohet përmirësimi i logjistikës ushtarake ndërmjet dy vendeve duke reduktuar procedurat burokratike. Bashkëpunimi do të shtrihet edhe në mbrojtjen e kufijve lindorë të aleancës. Gjermania ka kontribuar tashmë me sistemet Patriot në Rzeszów dhe me avionët Eurofighter në Malbork. Duke filluar nga kjo verë, inxhinierë të Bundeswehrit do të marrin pjesë në ndërtimin e pozicioneve mbrojtëse përgjatë kufirit me Rusinë dhe Bjellorusinë, në kuadër të operacionit “Eastern Shield”. Megjithatë, pavarësisht afrimit në fushën e sigurisë, marrëdhëniet mes Gjermanisë dhe Polonisë vazhdojnë të mbartin peshën e historisë. Përfaqësuesi i Qeverisë Federale Gjermane për marrëdhëniet gjermano-polake, Knut Abraham, vuri në dukje se krimet e kryera nga Gjermania gjatë pushtimit të Polonisë në Luftën e Dytë Botërore mbeten ende një barrë në raportet mes dy vendeve. Sipas tij, megjithëse gjatë dekadave të fundit janë bërë përpjekje të mëdha për pajtim dhe bashkëpunim, është e nevojshme që Gjermania ta përfshijë Poloninë më ngushtë në proceset vendimmarrëse evropiane. Ai sugjeroi gjithashtu se heqja e kontrolleve kufitare mes dy vendeve do të përmirësonte më tej marrëdhëniet dhe do të lehtësonte jetën e komuniteteve në zonat kufitare. Në një kohë kur siguria evropiane po përballet me sfida të reja dhe kur roli i SHBA-së në mbrojtjen e kontinentit shihet me më shumë pasiguri, marrëveshja e re gjermano-polake përfaqëson një hap të rëndësishëm drejt forcimit të bashkëpunimit evropian në fushën e mbrojtjes dhe sigurisë.