Autoritetet gjermane kanë çmontuar një grup nën dyshimet se kishin planifikuar sulme terroriste në emër të grupit ekstremist, ISIS K. Zyra e prokurorit federal ngriti akuza për 6 shtetasit e huaj, mes tyre 5 persona nga Taxhikistani dhe një i gjashtë nga Kirgistani, të cilët akuzohen ndër të tjera edhe për themelimin e një organizate terroriste. Sipas raportimeve të prokurorëve gjermanë, të dyshuarit synonin të sulmonin në Gjermani por edhe në vende të Evropës Perëndimore, por se nuk kishin një plan konkre4t në momentin kur ndërhynë forcat gjermane të sigurisë. Të dyshuarit, kishin qenë në kontakt me IS-K, që është një degë e Shtetit Islamik në Afganistan. Sipas hetuesve, të dyshuarit kishin shkuar në Gjermani përmes Ukrainës, pasi shpërtheu lufta atje, në pranverën e vitit 2022, dhe formuan celula terroriste së bashku me një anëtar tjetër nga Holanda. Prokurorët gjermanë thanë se të akuzuarit vazhdimisht diskutonin për qëllimet e tyre dhe vëzhgonin vendet e mundshme për kryerjen e sulmeve.