Tërheqja e trupave amerikane nga Gjermania do të shkaktonte humbje të konsiderueshme të vendeve të punës në rajonet ku ndodhen bazat ushtarake të SHBA-së. Një studim i publikuar së fundi nenvizon pasojat që do të kishte vënia në jetë e paralajmërimit të presidentit Donald Trump për largimin e 5,000 ushtarëve nga vendi. Studimi, i realizuar nga Qendra Leibniz për Kërkime Ekonomike Europiane dhe Universiteti i Këlnit, tregon se për çdo ushtar të larguar rrezikohet gjysma e një vendi pune me kohë të plotë në rajonet e prekura, ndërsa efektet ekonomike janë afatgjata. Hulumtimi u mbështet në përvojën e viteve 1990, kur pas përfundimit të Luftës së Ftohtë rreth 200,000 trupa amerikane u tërhoqën nga Gjermania. Sipas Jakob Schmidhäuser, kjo solli goditje të ndjeshme ekonomike në nivel rajonal. Ai theksoi se ndikimi nuk u kufizua vetëm te humbja e vendeve të punës në bazat ushtarake amerikane, pasi rreth 61 për qind e vendeve të humbura të punës ishin në biznese lokale që varen nga aktiviteti ekonomik i trupave amerikane dhe familjeve të tyre. Pasojat u ndjenë edhe në financat publike. Bashkautori i studimit, Johannes Kochems nga Universiteti i Këlnit, tha se komunat e prekura humbën rreth 9 për qind të të ardhurave buxhetore dhe u detyruan të marrin masa kursimi. Studimi vëren gjithashtu se pasojat sociale dhe ekonomike vazhduan për vite me radhë. Punëtorët që humbën vendet e punës pas mbylljes së bazave ushtarake kishin më pak mundësi punësimi edhe 15 vjet më vonë dhe fitonin mesatarisht rreth 9 për qind më pak krahasuar me periudhën para largimit të trupave.