Miliarda euro qëndrojnë të paprekura në llogari bankare të harruara në Gjermani, ndërsa mungesa e një regjistri qendror e bën të vështirë identifikimin e tyre nga trashëgimtarët. Sipas një raporti të Ministrisë gjermane të Kërkimit nga viti 2021, në llogari joaktive mund të ndodhen më shumë se katër miliardë euro, ndërsa disa vlerësime e çojnë shumën deri në nëntë miliardë euro. Problemi është se shumë prej këtyre pasurive mbeten të pazbuluara pas vdekjes së pronarëve. Me përhapjen e banking-ut online, dokumentet fizike janë bërë gjithnjë e më të rralla, ndërsa informacionet për llogaritë ruhen në e-mail ose pajisje elektronike, duke e vështirësuar punën e trashëgimtarëve. Në Gjermani nuk ekziston një përkufizim ligjor i qartë për të ashtuquajturat “llogari të fjetura”. Në praktikë, ato konsiderohen llogari ose investime financiare që kanë mbetur pa aktivitet për një periudhë të gjatë kohore. Ekspertët argumentojnë se zgjidhja më efektive do të ishte krijimi i një regjistri kombëtar për llogaritë e fjetura. Sipas Shoqatës Gjermane të Hulumtuesve të Trashëgimisë, një bazë e tillë e të dhënave do t’u mundësonte trashëgimtarëve të verifikonin nëse një person ka pasur llogari bankare apo pasuri financiare të pareklamuara. Debati në Gjermani zhvillohet edhe në dritën e praktikave ndërkombëtare. Në Mbretërinë e Bashkuar, fondet nga llogaritë e fjetura transferohen pas 15 vjetësh në një fond të posaçëm që financon projekte sociale dhe mjedisore, por pronarët mund t’i kërkojnë ato në çdo kohë. Irlanda ndjek një model të ngjashëm, në Shtetet e Bashkuara llogaritë e pashfrytëzuara zakonisht kalojnë nën administrimin e shteteve federale, pa humbur të drejtën e pronësisë, ndersa ne Francë dhe Zvicër zbatohen rregulla më të ashpra duke qene se atje, pas periudhash të gjata pa aktivitet dhe pa kërkesa nga pronarët ose trashëgimtarët, fondet mund të kalojnë përfundimisht në pronësi të shtetit.