Bundestagu gjerman i hoqi besimin Kancelarit Olaf Scholz. Në votimin e mbajtur pas mocionit të votëbesimit, vetëm 207 deputetë votuan pro, 394 kundër dhe 116 abstenuan. Me këtë rezultat, Scholz nuk mundi ta siguronte shumicën e nevojshme prej 367 votash. Presidentja e Bundestagut, Bärbel Bas, deklaroi se rezultati i votimit do t'i përcillet tani Presidentit Federal, Steinmeier, i cili pritet të shpërndajë parlamentin. Pas shpërndarjes së parlamentit, duhet të ketë zgjedhje të reja brenda 60 ditëve. Dita e zgjedhjeve federale përcaktohet zyrtarisht nga Presidenti Federal në përputhje me Ligjin Federal Zgjedhor. Në Gjermani është përcaktuar 23 shkurti. Humbja e votëbesimit dhe shpërbërja e Bundestagut nuk e ndryshojnë faktin që kancelari dhe qeveria e tij janë në detyrë si zakonisht. Funksioni i kancelarit federal përfundon vetëm kur një Bundestag i ri mblidhet pas zgjedhjeve të reja (neni 69 i ligjit themelor). Edhe atëherë, kancelari Scholz qëndron në detyrë me kërkesë të Presidentit Federal, derisa një Bundestag i sapozgjedhur të ketë zgjedhur kancelarin e ri.