Një i dënuar me burgim të përjetshëm është vetëvarur në Qendrën Spitalore të Burgjeve mëngjesin e kësaj të hëne. 86-vjeçari Njazi Raki Ceka rezultonte i dënuar me burgim të përjetshëm për veprën penale “vrasje me paramendim dhe vrasje me dashje”. Ngjarjen e bëri të ditur Drejtoria e Përgjithshme e Burgjeve, ku mësohet se vdekja e 86-vjeçarit ka qenë si pasojë e vetëvarjes në tualetin e dhomës në spitalin e burgut. 86-vjeçari që vuante dënimin në burgun e Durrësit ishte shtruar në spital 11 ditë më pare për probleme kardiake dhe ishte akomoduar në Seksionin e Kujdesit të Veçantë, për arsye të gjendjes së tij shëndetësore. Stafi i Qendrës Spitalore, në momentin e konstatimit të ngjarjes nga ana e punonjësit të shërbimit, është përpjekur ti jap ndihmën e parë pacientit, por pa rezultat. Pas konstatimit, janë njoftuar familja e të ndjerit si dhe organet hetimore. Prokuroria dhe policia janë duke kryer hetimet për rastin, ndërsa një ekip i DPB me urdhër të Drejtorit të Përgjithshëm, është paraqitur në vend, për të vlerësuar situatën dhe veprimet e stafit, sipas Drejtorisë së Përgjithshme të Burgjeve.