Një 25-vjeçar është gjetur i pajetë në shtratin e një kanali me ujë vaditës në Mat. Familjarët e të riut lajmëruan policinë e Matit rreth orës 23.35, të mbrëmjes së së të enjtes, se 25-vjeçari kishte shkuar në pyll për të mbledhur kërpudha por nuk ishte kthyer ende në banesë. Policia nisi menjëherë kërkimet në zonën e fshatit Shulbatër, për gjetjen e tij. Pas disa orësh kërkime në bashkëpunim me banorët e zonës dhe familjarët e tij, është gjetur trupi i tij i pajetë. Sipas policisë, nga këqyrja paraprake, nuk janë konstatuar shenja dhune apo dëmtime të tjera. Nga veprimet e para hetimore dyshohet se ky shtetas është mbytur aksidentalisht. Grupi hetimor, në drejtimin e Prokurorisë, vijon punën hetimore për zbardhjen e plotë të rrethanave të kësaj ngjarjeje.