Një burrë humbi jetën në Greqi të premten, si pasojë e zjarreve të përhapura nga erërat e fuqishme. Më shumë se 200 zjarrfikës, të mbështetur nga 11 avionë dhe shtatë helikopterë, po tentojnë të shuajnë zjarret në Keratea, në juglindje të Athinës, njoftuan autoritetet. Banorët në disa zona janë evakuuar. Zjarrfikësit gjetën trupin e pajetë të një të moshuari brenda shtëpisë së tij të djegur në Keratea, ndërsa erërat e forta po ua vështirësojnë punën avionëve cisternë për të vepruar. Më herët, një zjarr tjetër në ishullin Kefalonia ishte vënë nën kontroll, sipas autoriteteve lokale, ndërsa situata “është përmirësuar” në gadishullin e Peloponezit, në perëndim të Athinës. Ministria e Mbrojtjes Civile kishte njoftuar se erërat do të shtohen, veçanërisht në Egjeun Jugor dhe Kretë. Ministria vendosi disa zona në nivelin më të lartë të alarmit për zjarre për të shtunën, përfshirë rajonin e Atikës, ku ndodhet Athina. Greqia dhe vende të tjera të Mesdheut ndodhen në një zonë që shkencëtarët e quajnë “pikë të nxehtë të zjarreve”. Edhe Franca jugore, po përballet aktualisht me zjarrin më të madh në dekada. Ekspertët thonë se ndryshimet klimatike po shkaktojnë zjarre më të shpeshta dhe më intensive dhe katastrofa të tjera natyrore.