Dy nga katër qytetarët amerikanë të marrë peng 3 dite me pare pasi kaluan kufirin në verilindje të Meksikës janë gjetur të vdekur, tha sot në një konferencë shtypi guvernatori meksikan Americo Villarreal, duke shtuar se dy te tjeret janë gjetur gjallë. Katër shtetas amerikanë u rrëmbyen nën kërcënimin e armës më 3 mars teksa po udhëtonin me makinë për në qytetin Matamoros, në shtetin verilindor meksikan të Tamaulipas. Zyrtarët amerikanë ende nuk kanë konfirmuar vdekjen e dy shtetasve të tyre. “Nga katër amerikanët, dy janë të vdekur, një person është i plagosur dhe tjetri është ende gjallë”, tha guvernatori i Tamaulipas, Americo Villarreal, gjatë një konference për media. Autoritetet amerikane dhe meksikane kanë kryer hetime lidhur me rrëmbimin te fundjavës, ku një grua meksikane gjithashtu humbi jeten. Rrjeti CBS News ka raportuar se amerikanët e rrëmbyer ishin: Latavia McGee, Shaeed Woodard, Eric James Williams dhe Zindell Brown. Që të katërt po udhëtonin përmes Matamoros – qytet me 500.000 banorë që gjendet përgjatë kufirit mes SHBA-së dhe Meksikës në Teksas – me një mini-furgon me targa të Karolinës së Veriut, kur një person i armatosur, i paidentifikuar deri më tani, hapi zjarr ndaj tyre.