Pas kritikave të kryeministrit Edi Rama dhe kërkesës së ministrit Ulsi Manja për hetim disiplinor të prokurores së Shkodrës, Elsa Gjeli, kjo e fundit i kërkoi këtë të premte Këshillit të Lartë të Prokurorisë të mos heshtë, por ta mbrojë. Përmes kësaj shkresë që Top Channel e disponon, Elsa Gjeli, magjistrate prej një viti në detyrë, ja shpreh shqetësimin qeverisë së prokurorisë, duke treguar hap pas hapi jo vetëm se si e hetoi Thethin, por edhe dosje të tjera të krimit të organizuar, për të cilat thotë se jeta e saj u vu në rrezik. Në fillim, prokurorja Elsa Gjeli thotë se deklaratat e Ramës janë të paprecedente, diskriminuese dhe që kapërcejnë çdo kritikë të lejuar politike, duke e vendosur në shënjestër tërësisht profesionale. Prokurorja i kërkon KLP të analizojë sjelljen e kryeministrit, duke e konsideruar qëndrimin e tij si ndërhyrje e për këtë i kujton deklaratën e ambasadorit të Bashkimit Evropian se të gjithë duhet të ndalojnë presionin ndaj drejtësisë. Reagimi i prokurores Gjeli mori përgjigjen e kryeminsitrit Rama, i cili gjatë takimit me kryebashkiakët tha se reforma e re për menaxhimin e territorit do të shmangë “gjelat” nëpër Prokurori dhe gjykata, duke iu referuar pikërisht prokurores së Shkodrës. “Ajo që ka ndodhur në Theth gjatë periudhës së zgjedhjeve ose le të themi në muajt para dhe gjatë zgjedhjeve ka pasur një bum ndërtimesh pa leje si rezultat edhe i përgatitjes së sezonit turistik. Jo një por 40 denoncime janë bërë nga policia e shteti për këto ndërtime. Struktura e policisë ka denoncuar ndërtimet pa leje në prokurori dhe siç është bërë e ditur, në një flagrancë spektakolare, ku është ndërtuar një fshat i tërë turistik në mes të Thethit, një prokurore me mbiemrin Gjeli, ka vendosur mos fillimin e hetimeve. Ka refuzuar të shohë se për çfarë bëhet fjalë, ka bërë një ese filozofike për pafajësinë e ndërtimit pa leje. Kjo është vepër penale. Ndërkohë që ndërtimi pa leje në një zonë të mbrojtur si Thethi është një vepër penale edhe më e rendë. Nga ana tjetër IKMT ka filluar të veprojë, por duhet thënë që qoftë ne Theth ose Vlorë, ose territore të tjera”, u shpreh Rama. Prokurorja Gjeli argumentoi se nuk kishte nisur hetimin për ndërtimet pa leje në Theth, pasi kabinat ishin mbi gurë dhe jo beton, por nga pamjet që publikoi kryeministri rezultonte e kundërta.