Robotët janë gjithnjë e më shumë një pjesë integrale e jetës njerëzore. Studimi i kryer nga Universiteti George Mason vërtetoi se gënjeshtrat e robotëve janë të pranueshme vetëm nëse ato kanë një qëllim të mirë. Studiuesit rekrutuan rreth 500 njerëz të cilët kishin për detyrë të miratonin ose refuzonin sjelljen e një roboti bazuar situatave të ndryshme të cilave iu nënshtroheshin. Studimi i botuar në revistën “Frontiers in Robotics” zbuloi reagimin e pjesëmarrësve ndaj "mashtrimeve" të androidëve. Njerëzit gjithashtu kishin për detyrë të përcaktonin se sa serioze ishin gënjeshtrat ose nëse ato mund të justifikoheshin në ndonjë mënyrë. Për shembull, konsiderohej e pranueshme nëse një robot me funksione infermierie siguron pacienten që vuante nga Alzheimer duke i thënë se burri i saj do të jetë së shpejti në shtëpi. Ky lloj "mashtrimi" shihej si një mbrojtje nga pikëllimi për ata që vuanin nga kjo dobësi. Ndërsa të rrezikshme dhe manipuluese janë konsideruar filmimet që bëjnë robotët në mjedisin që i rrethon, pa e komunikuar atë. Të papranueshme janë cilësuar edhe pretendimet e robotëve që u ishte ngarkuar një detyrë për të pastruar ambientin, por ata thanë se “janë të lodhur”. Në fund, pothuajse të gjithë njerëzit që morën pjesë në këtë studim deklaruan se shqetësimi më i madh mbetet çdo teknologji që tenton të fshehë natyrën e vërtetë të aftësive të saj