Vendpushimi i preferuar i golfit Turnberry i presidentit amerikan Donald Trump në Skoci është përdorur nga protestues palestinezë për t’i dhënë një mesazh presidentit amerikan. Ata kanë mundur që brenda fushës së golfit në Skoci të shkruajnë mesazhin: Gaza nuk është në shitje! Aksionin e mori përsipër Grupi i Veprimit Palestinez, grup i cili raportohet të ketë dëmtuar edhe ambiente të tjera të klubit sportiv luksoz gjatë së shtunës. Sipas këtij grupi kjo formë proteste ishte një përgjigje ndaj deklaratave të presidentit amerikan për të zhvendosur banorët e Gazës dhe për ta kthyer atë në "Rivierën e Lindjes së Mesme". Aktivistët thanë se morën shkas nga një video të krijuar me inteligjencë artificiale që presidenti amerikan shpërndau në internet javën e kaluar, e cila tregonte territorin e rrafshuar palestinez të rindërtuar si një vendpushim bregdetar nën markën Trump. Një skenë e videos tregoi gjithashtu vetë presidentin trump që pushonte në krah të kryeministrit izraelit Benjamin Netanyahu, teksa shijonin edhe nga një pijë. “Ndërsa Trump përpiqet ta trajtojë Gazën si pronë e tij, ai duhet të dijë se edhe prona e tij është e arritshme”, tha grupi që mori përsipër aksionin. Policia e Skocisë i tha AFP se po e hetonte ngjarjen. Klubi i golfit Turnberry ndodhet në jugperëndim të Skocisë dhe është një nga dy resortet që zotëron Trump atij. Një zëdhënës i tij e cilësoi aktin fëmijëror dhe kriminal ndërsa i gjithë ekipi ka marrë masa që ngjarja të mos përsëritet. "Turnberry është një thesar kombëtar dhe do të vazhdojë të jetë feneri numër një i luksit dhe përsosmërisë në botën e golfit.", u shpreh ai.