Këshilli i Sigurimit i Organizatës së Kombeve të Bashkuara ka miratuar për herë të parë një rezolutë që kërkon armëpushim në Gaza. Rezoluta, e cila kërkon një "armëpushim të menjëhershëm" për muajin e shenjtë të u miratua, me 14 vota në këshillin e sigurimit, ndërsa Shtetet e Bashkuara të Amerikës abstenuan. Si aleatë të Izraelit, Shtetet e Bashkuara në votimet e mëparshme kanë vendosur veton ndaj rezolutave që janë propozuar. Përmes kësaj rezolute të miratuar këtë të hënë kërkohet gjithashtu “lirimi i menjëhershëm dhe pa kushte i të gjitha pengjeve” si dhe heqja “e pengesave që do të mundësonte dërgimin e ndihmës humanitare në Gaza. Rezoluta tashmë e miratuar, nuk është e lidhur me bisedimet që po vazhdojnë, që udhëhiqen nga Katari dhe mbështeten nga SHBA-ja dhe Egjipti. Këto bisedime synojnë ndaljen e luftimeve në këmbim që Hamasi – grupi palestinez i shpallur organizatë terroriste nga SHBA-ja dhe Bashkimi Evropian – që të lirojë pengjet. Deri më tani, si pasojë e ofensivës izraelite në Rripin e Gazës janë vrarë mbi 32.000 persona, shumica gra dhe fëmijë, sipas Ministrisë së Shëndetësisë në enklavën e udhëhequr nga Hamasi.