Kryeministri i Izraelit, Benjamin Netanyahu, raportohet se ka rënë dakord që t’i japë fund brenda dy javësh luftës në Gazë. Lajmin e ka bërë të ditur mediumi “Israel Hayom”, të bazuar në burime nga biseda e Netanyahut me presidentin amerikan, Donald Trump. Në artikull thuhet se Trump dhe Netanyahu janë dakordësuar në një bisedë telefonike që t’i japin fund luftës dhe që katër shtete arabe, përfshirë Emiratet e Bashkuara Arabe dhe Egjipti, të bashkëqeverisin Rripin e Gazës në vend të Hamasit. Marrëveshja përfshin edhe pikën që shumë shtete do të pranojnë refugjatë nga Gaza. E aty theksohet po ashtu se do të zgjerohet lista e shteteve arabe dhe myslimane që e njohin Izraelin dhe që do të vendosin raporte diplomatike me të. Pikë tjetër është edhe shprehja e përkushtimit të Izraelit për një zgjidhje “me dy shtete” me Palestinën, bazuar në reformat e Autoritetit Palestinez. Sipas “Israel Hayom”, ka qenë presion i madh i Trumpit që Izraeli të ndalë luftën në Gaza.