Drejtori i Përgjithshëm i Organizatës Botërore të Shëndetësisë Tedros Adhanom Ghebreyesus deklaron se qendra mjekësore Al Shifa në Gaza "nuk po funksionon më si spital" dhe gjendja në spitalin më të madh të Gazës është "e tmerrshme dhe e rrezikshme". Shefi i OBSH-së tha se "të shtënat me armë zjarri dhe bombardimet e vazhdueshme" rreth spitalit i "kanë përkeqësuar rrethanat tashmë kritike të popullatës civile”, duke shtuar se 18 nga 36 spitale të Gazës nuk funksionojnë më. Duke ngritur zërin në Këshillin e Sigurimit, Ghebreyesus tha se: "Korridoret e spitaleve janë të mbushura me të plagosur, të sëmurë dhe të vdekur; morgjet janë gjithashtu të tejmbushura; operacionet po bëhen pa anestezi dhe ka dhjetëra mijëra njerëz të zhvendosur që strehohen në spitale". Sipas kreut të OBSH-së ndaj sistemeve të kujdesit shëndetësor në Gaza ka pasur më shumë se 250 sulme. "Unë e kuptoj se çfarë po kalojnë fëmijët e Gazës, sepse si fëmijë kam kaluar të njëjtën gjë," tha shefi i OBSH-së, i cili është nga rajoni Tigray i Etiopisë. "Tingulli i armëve dhe i predhave që fishkëllenin nëpër ajër; era e tymit pasi ata godisnin; plumba gjurmues në qiellin e natës; frika; dhimbja; humbja -- këto gjëra kanë qëndruar me mua gjatë gjithë jetës sime." Ai nënvizoi edhe situatën e rëndë në spitalin Al-Quds në qytetin e Gazës, për të cilin Gjysmëhëna e Kuqe tha se u qëllua nga snajperët izraelitë. Mbledhja e Këshilli i Sigurimit nisi me një minutë heshtje për të nderuar viktimat e sulmit të Hamasit, civilët e vrarë në sulmet hakmarrëse të Izraelit në Gaza, si dhe gazetarët dhe personelin e OKB-së që kanë vdekur në luftë. Pamjet: AFP