Presidenti iranian Masoud Pezeshkian në fjalimin e tij në Asamblenë e Përgjithshme të Kombeve të Bashkuara i është përgjigjur fjalimit të presidentit amerikan Donald Trump të një dite më parë. “Presidenti i SHBA-së na përshkroi si terroristë. Ne kemi qenë viktima të terrorizmit”, tha Pezeshkian. Ai tha se Shtetet e Bashkuara “bombarduan një shkollë dhe se fëmijë humbën jetën nën bomba, me armë të përdorura nga SHBA-ja dhe Izraeli”. Ndërsa Pezeshkian vijonte fjalimin, delegacioni amerikan u largua nga salla. Duke iu rikthyer fjalimit të Donald Trump të një dite më parë, Pezeshkian tha se deklaratat e presidentit amerikan për Iranin bien ndesh me vetë frymën e Kartës së Kombeve të Bashkuara. Gjatë fjalimit, ai deklaroi megjithatë se Teherani është i gatshëm për dialog dhe diplomaci, por jo në kushtet e kërcënimeve apo përdorimit të forcës. “Jemi të gatshëm për dialog dhe diplomaci dhe për negociata - pa pranuar gjuhën e forcës”, theksoi Pezeshkian. Duke folur për Ngushticën e Hormuzit, një nga rrugët kryesore të transportit të naftës në botë, Pezeshkian tha se Irani nuk mund t’i lejojë që disa vende të kalojnë në këtë rrugë ujore dhe ndërsa njëkohësisht, sipas tij, e përdorin atë për të ushtruar agresion.