Ka zgjatur vetëm pak orë paqja mes Shteteve të Bashkuara të Amerikës dhe Iranit, pasi ky i fundit bllokoi sërish Ngushticën e Hormuzit, pikën më strategjike të kalimit të naftës në botë, duke rikthyer shqetësimin në tregjet ndërkombëtare. Menjëherë pas vendimit të Gardës Revolucionare, presidenti amerikan, Donald Trump, thirri një takim urgjent në Dhomën e Situatave në Shtëpinë e Bardhë për të diskutuar krizën në Ngushticën e Hormuzit dhe negociatat me Iranin. Mediat botërore raportojnë se, nëse nuk do të ketë një përparim së shpejti, lufta mund të rifillojë në ditët në vijim. Në takim morën pjesë Zëvendëspresidenti J.D. Vance, Sekretari i Shtetit, Marco Rubio, shefi i Pentagonit, Pete Hegseth, dhe Sekretari i Thesarit, Scott Bessent. Takimi urgjent erdhi pasi Trump deklaroi nga Shtëpia e Bardhë se Irani nuk mund t'i shantazhojë me mbylljen e Ngushticës së Hormuzit. "Ata nuk mund të na shantazhojnë. Po flasim me ta dhe, e dini, po mbajmë një qëndrim të ashpër. Ata vranë shumë njerëz”, tha Trump. Ndërkohë, ushtria amerikane po planifikon të nisë në ditët në vijim një seri bastisjesh dhe sekuestrimesh të anijeve të lidhura me Iranin në ujëra ndërkombëtare, në një lëvizje që synon të rrisë presionin ekonomik dhe ushtarak ndaj Teheranit, ndërsa tensionet në Hormuz mbeten të larta. Sipas raportimeve të Ëall Street Journal, SHBA po përgatitet të ndalojë cisterna dhe anije tregtare të dyshuara si të lidhura me Iranin edhe jashtë Lindjes së Mesme, duke zgjeruar ndjeshëm operacionet e saj të mbikëqyrjes detare në nivel global. Ky zhvillim vjen në një moment kur forcat iraniane kanë shtuar praninë e tyre në Ngushticën e Hormuzit dhe kanë sulmuar të paktën dy anije tregtare, ndërsa Teherani ka deklaruar se po “kontrollon fort” këtë rrugë ujore strategjike. Sipas burimeve amerikane, administrata e Uashingtonit synon të rrisë presionin për ta detyruar Iranin të garantojë kalim të lirë në ngushticë dhe të bëjë lëshime në programin e tij bërthamor, i cili mbetet një nga pikat kryesore të negociatave mes dy vendeve. Zyrtarë ushtarakë amerikanë theksojnë se operacioni do të synojë çdo anije me flamur iranian ose ato që ofrojnë mbështetje për Teheranin, përfshirë edhe të ashtuquajturën “flotë në hije”, e cila dyshohet se shmang sanksionet dhe rregulloret ndërkombëtare.