Qeveria shqiptare do të nisë një reformë të re në administratën publike, në përmbushje të detyrimeve pas hapjes së kapitujve të parë të anëtarësimit në Bashkimin Evropian. Ministrja e Shtetit për Administratën Publike dhe Antikorrupsionin, Adea Pirdeni, paralajmëroi ndryshime ligjore dhe krijimin e një sistemi llogaridhënieje. Ministrja Pirdeni nuk dha detaje se cilat pika të ligjit do të preken, por neni 1 i ligjit për nëpunësin civil thekson se qëllimi është krijimi i një shërbimi civil të qëndrueshëm, profesional dhe të bazuar në meritë. Pikërisht kjo e fundit ishte një pikë e dobët e administratës publike shqiptare, që vëren raporti i monitorimit i OECD/SIGMA, i prezantuar këtë të martë në Tiranë. Drejtuesi i këtij programi, që mbështetet nga Bashkimi Evropian, renditi pikat e forta të administratës shqiptare, që sipas tij, e bëjnë lidere në rajon, por që ka edhe pika, ku kërkohet ndërhyrje, mes të cilave meritokracia e munguar. "Niveli i lartë i drejtuesve nuk plotëson tërësisht standardet e bazuara në meritë. Jemi të gatshëm ta projektoni në mënyrë që garanton kompetencën që është themelore. Së dyti besimi mes ministrave dhe drejtuesve të nivelit të lartë duhet të jetë funksionale. Ka shumë çështje të mbartura administrative në gjykatë” Kryeministri Edi Rama vlerësoi kritikat e vërejtura në raportin ndërkombëtar, duke paralajmëruar një skaner të plotë të ligjit përmes inteligjencës artificiale. “Prodhojmë sh akte nënligjore. Modeli i inteligjencës aritificiale është testuar dhe ka nisur punën, për të bërë 95% të shërbimeve. Do ketë skaner të plotë të të gjitha mbivendosjeve në legjislacion. Në mandatin e katërt, do pastrojmë të gjithë pjesën e ‘barit të keq’ në lëndinën e legjislacionit tonë”. Kreu i qeverisë paralajmëroi gjithashtu modernizimin e të gjithë sistemit, si rruga e vetme për t’i dhënë fund korrupsionit. “Ilaçi ‘kap, arresto, dëno’, është vetëm njëra anë. Më e rëndësishmja është modernizimi i gjithë sistemit, në të kundërt nuk ka shans që problematika e korrupsionit të zgjidhet. Duhen sisteme që të mos e mundësojnë korrupsionin. Gjermanët nuk e kanë në ADN që janë të ndershëm, por kanë një sistem shtetëror që e bën shumë të vështirë”. Gjetjet e raportit të SIGMA-s janë burimi kryesor i vlerësimit të Komisionit Evropian në fushën e Administratës Publike në Raportet vjetore të Progresit. SIGMA është një nismë e përbashkët e Organizatës për Bashkëpunim Ekonomik dhe Zhvillim dhe BE-së.