Foltorja e Sali Berishës këtë të martë nuk ishte ajo e Kuvendit, por takimi me qytetarët e Tiranës. Ai nuk iu bashkua seancës plenare, por nisi foltoren me qytetarët nga njësia 9 e kryeqytetit, prej ku shigjetoi jo vetëm rivalin politik, Edi Ramën, por pati një përgjigje dhe për lëvizjet e reja brenda demokratëve. Berisha komentoi dhe arrestimin e Federica Mogherini, ndërsa shprehu bindjen se Rama nuk do ta gëzojë mandatin e katërt në pushtet. Përveç autokritikës për situatën ku ndodhet partia e tij, Sali Berisha u përball me pakënaqësi të shumta nga qytetarët, të cilët nuk i kursyen kritikat. Në foltoren e parë nuk kishte vetëm kritika ndaj Partisë Demokratike, por takimi u mbyll me një situatë të sikletshme për Berishën. Ndërsa Sali Berisha nisi foltoren me qytetarët, që pritet të vijojë në të gjitha qytetet e vendit, Ervin Salianji ka njoftuar një takim me demokratët, mbrëmjen e të mërkurës, në qytetin e Durrësit.