Zgjedhjet presidenciale të nëntorit në këtë vend do të jenë zgjedhje midis një ish-prokuroreje dhe një “krimineli të dënuar”, sipas nënpresidentes së Shteteve të Bashkuara, Kamala Harri. Me këtë shprehje, kandidatja e mundshme për presidente nga Partia Demokratike iu referua kandidatit të Partisë Republikane, Donald Trump. Ajo i bëri komentet në tubimin e parë të saj zgjedhor në Uiskonsin. Një ditë më herët u bë e qartë se nënpresidentja ka mbështetjen e shumicës së delegatëve demokratë, për t’u nominuar kandidate për presidente. Presidenti aktual, Joe Biden, i dha asaj mbështetje, pasi vetë u tërhoq nga gara për rizgjedhje më 21 korrik. Duke folur para mijëra mbështetësve në Uiskonsin, Harris e krahasoi Trumpin me, siç tha, mashtruesit që si ish-prokurore i ka ndjekur penalisht. Gjatë fjalimit, ajo parashtroi edhe një sërë prioritetesh liberale që tha se do t’i ketë nëse zgjidhet presidente, përfshirë këtu: kontrollin e armëve dhe qasjen në abort. “A duam të jetojmë në një vend të lirisë, ndjesisë dhe sundimit të ligjit, apo në një vend të kaosit, frikës dhe urrejtjes?”, tha ajo. Trump reagoi me një postim në rrjetet sociale, ku shkroi se “Kamala Harris gënjen” dhe “shkatërron gjithçka që prek”.