Kur më 5 dhjetor prokurorit të Përgjithshëm, Olsian Çela, i përfundon mandati 7-vjeçar, Këshilli i Lartë i Prokurorisë hapi garën që do të zhvillohet mes pretendentëve për këtë post. Thirrja publike për të interesuarit u publikua pas votimit unanim të anëtarëve, të cilëve u desh një ditë e gjysmë të qartësoheshin mbi rregullat e garës, pasi dështuan në mbledhjen e kësaj të marte. Siç raporton gazetarja e Top Channel Anila Hoxha, njëri nga anëtarët e KLP lexoi kriteret për kandidatët që synojnë drejtimin e akuzës për shtatë vitet e ardhshme, mes tyre të ketë 15 vjet si jurist i spikatur, të jetë i diplomuar në Shkollën e Magjistraturës apo të ketë gradë shkencore në drejtësi. Si kushte ndaluese u renditën të mos ketë mbajtur pozicione drejtuese në parti politike, të mos ketë qenë anëtar i ish-Sigurimit të Shtetit dhe as bashkëpunëtor i shërbimeve të inteligjencës. Kushdo që synon postin e prokurorit të Përgjithshëm ka afat 30 ditë, brenda të cilave duhet të dorëzojë dokumentet. Pasi dokumentet të dorëzohen, gjatë muajit gusht e në vijim do të kryhet kontrolli i pasurisë dhe pastërtisë së figurës së konkurrentëve. Deri më tani janë lakuar tre emra që mund të shfaqin interes, që të tre prokurorë: Pranvera Pustina, Rovena Zoto dhe Ylli Pjetërnika. Nuk ka ende emra të përmendur jashtë sistemit, ndërsa nuk përjashtohet mundësia që të ketë edhe prokurorë të SPAK që mund të synojnë postin e prokurorit të Përgjithshëm.