Ekonomitë më të mëdha të Perëndimit ranë dakord të premten të vendosin një çmim fiks të caktuar për naftën ruse së shpejti, në një përpjekje për të reduktuar aftësinë e Moskës për të financuar luftën e saj në Ukrainë dhe njëkohësisht pa nxitur më tej inflacionin global. Ministrat e financave nga grupi i vendeve të G7 – Shtetet e Bashkuara, Japonia, Kanadaja, Gjermania, Franca, Italia dhe Mbretëria e Bashkuar – thanë se do të ndalonin ofrimin e shërbimeve që mundësojnë transportin detar të naftës së papërpunuar dhe produkteve të naftës me origjinë ruse në mbarë botën, mbi kufirin e çmimit të përcaktuar.. Çmimi maksimal do të vendoset nga një koalicion i gjerë vendesh, thanë liderët e G7 në një deklaratë të përbashkët. Vendimi do të hyjë në fuqi së bashku me grupin e ardhshëm të sanksioneve të Bashkimit Evropian, të cilat përfshijnë një ndalim të importeve detare të naftës ruse duke filluar nga dhjetori. Në vazhdën e këtij vendimi rusia kishte kërcënuar tashmë se do të hakmerrej duke ndaluar eksportet e naftës në vendet që zbatojnë një kufi në cmim. "Ne thjesht nuk do të furnizojmë më naftë dhe produkte nafte për kompani ose shtete të tilla që vendosin kufizime, " u tha gazetarëve të enjten zëvendëskryeministri Alexander Novak, sipas agjencisë shtetërore të lajmeve TASS. Administrata Biden ka kërkuar prej muajsh që qeveritë të vendosin një kufi në çmimin e naftës. Perëndimi ka sanksionuar tashmë shumë eksporte ruse të energjisë, por Moska ka vazhduar të fitojë miliarda dollarë në muaj duke devijuar naftën në Kinë dhe Azi. Se si, kur dhe sa mund të kufizohet çmimi i naftës ruse, kjo mbetet ende për t'u parë. Ndërkohë që nga fillimi i korrikut, çmimet e naftës kanë rënë afërsisht 18% në pritje që recesioni do të reduktojë kërkesën, por ato janë ende rreth 20% më të larta se një vit më parë.