Fytyra e presidentit të Shteteve të Bashkuara, Donald Trump ka gjasa të shfaqet në pasaportën amerikane. Departamenti i Shtetit po përfundon një projekt për ndryshime të dokumenteve në fjalë, ku vëmendjen e tërhoqi në mënyrë të vecantë ky element i pazakontë: Mundësia e përfshirjes së portretit të Trump, si nismë e lidhur me përgatitjet për 250-vjetorin e pavarësisë. Projekti parashikon një seri të kufizuar prej rreth 25 mijë pasaportash me dizajn të ri, shkruan The Guardian. Draftet fillestare përfshijnë portretin dhe firmën e Trumpit, duke zëvendësuar disa nga elementet grafike tradicionale të pasaportave amerikane. Ekspertët vënë në dukje se një vendosje e tillë do të ishte e paprecedentë, pasi praktika ndërkombëtare zakonisht shmang përfshirjen e figurave politike në detyrë ose liderëve shtetërorë në dokumente zyrtare. Megjithatë, plani ende nuk është miratuar zyrtarisht dhe autoritetet amerikane nuk kanë konfirmuar nëse ky ndryshim do të vihet vërtet në jetë. Sipas raporteve në media, nëse inciaitivë bëhet realitet, dokumentet me botim të kufizuar, do të tregojnë fotografinë e Donald Trump në faqen e brendshme të pasaportës, e rrethuar nga teksti i Deklaratës së Pavarësisë dhe flamuri amerikan, ndërsa firma e tij do të jetë në ngjyrë të artë. Një faqe tjetër përmban pikturën e njohur të themeluesve të shtetit duke nënshkruar pikërisht këtë dokument, ndërkohë që sipas DASH ai do të vazhdojë të ruajë tiparet ekzistuese të sigurisë, si një nga “dokumentet më të sigurta në botë”.