Shtetet e Bashkuara vendosën sanksione të reja ndaj Iranit, me pretendimin se Republika Islamike po furnizon Rusinë me raketa balistike me rreze të shkurtër veprimi për t’i përdorur në Ukrainë. Pohimin e bëri vetë Sekretari amerikan i Shtetit, Antony Blinken, që pohoi se sanksionet synojnë të kufizojnë më tej "aktivitetet destabilizuese të Iranit" dhe kanë në shënjestër individë dhe biznese me bazë në Iran dhe Rusi, duke përfshirë linjën ajrore të Iranit, “Iran Air”, për të cilën Ëashingtoni thotë se është përdorur për transferimin e armëve. Bashkëpunimi në rritje mes Rusisë dhe Iranit kërcënon sigurinë europiane dhe tregon se si ndikimi destabilizues i Iranit shtrihet përtej Lindjes së Mesme. Rusia nga ana e saj e saj, po i jep Iranit teknologjinë për të cilën Teherani ka nevojë. Kjo është një rrugë me dy drejtime, duke përfshirë çështjet bërthamore, si dhe shkëmbimin e disa informacioneve mbi teknologjinë hapësinore. Zëdhënësi i Pentagonit, Pat Ryder konfirmoi më herët se Irani ka transferuar dërgesa të raketave balistike me rreze të shkurtër veprimi “Fath-360” në Rusi dhe se ato mund të përdoreshin kundër Ukrainës "brenda disa javësh". Këto raketa mund të godasin objektiva në një distancë prej 120 kilometrash. Sipas tij, përpara transferimit të raketave, personeli ushtarak rus ishte trajnuar në Iran për të përdorur këtë system.