Operacionet e kërkimit nxorën 4 trupa mbrëmjen e së mërkurës nga jahti luksoz i fundosur pranë brigjeve të Sicilisë. Trupat e gjetur nga zhytësit janë ato të Xhonatan Blumer, presidentit të Morgan Stenli International, gruas së tij Ana Elizabet, avokatit Kris Morvilo dhe gruas së tij Nada. Mes personave në bord ishte edhe miliarderi britanik Mike Linç dhe e bija 18-vjeçare Hannah, që ende nuk janë gjetur. Superjahti është në fund të detit, pranë brigjeve të fshatit Portiçelo, në një thellësi prej 50 metrash, çka kërkon masa të veçanta për zhytësit. Ekipet speciale thanë se po realizonin zhytje në intervale prej 12 minutash, çka ka ngadalësuar përpjekjet për të kërkuar brenda të jahtit të fundosur. Jahti 56 metra i gjatë dhe që lundronte nën flamurin britanik, ishte ankoruar rreth një kilometër larg bregut dhe u fundos për 2 minuta. Në mesin e disa pyetjeve shqetësuese se përse nga mbytja e jahtit shpëtuan anëtarët e ekuipazhit, por jo pasagjerët, mbërrin lajmi se zyrtarët janë duke hetuar pretendimet se kapakët e lënë hapur shkaktuan mbytjen e varkës brenda një kohe shumë të shkurtër. Vëllai i kapitenit Xhejms Katfilld këmbëngul se 51 vjeçari ishte një marinar shumë i zoti dhe shumë i respektuar në Mesdhe. Zyrtarët besojnë se jahti u godit nga një tornado mbi det gjatë stuhisë që filloi para orës katër të mëngjesit.